INTERNASJONAL KOLLEKTIVUTSTILLING: STRIKKNIKK

Eit teservise, eit rom kledd i aranmønstra strikk, ein radiator, heile hus, skuggebilete og eit enormt amerikansk flagg. Alt er strikka. Noko er bitte lite og skjørt, som dei tre kjolane i blondestrikk som får plass på ein liten strikkepinne. Anna sprengjer dei format vi kan tenkje oss, som flagget, ”maskinstrikka” med gravemaskin og enorme pinnar, eller husveggane vi kan kle på oss.

Det handlar om omsorg, rollar og forventningar, om tradisjon, brot og provokasjon. Utstillinga skal røre og opprøre, og hente fram både smil og gåsehud.

Det handlar om å vise mangfaldet i strikking som kunstnarisk språk, og deltakarane kjem frå alle verdshjørne: Australia, Canada, Danmark, England, Finland, Japan, Litauen, Nederland, Norge, Skotland, Tyskland, USA.